சரியாக 15 நாட்களுக்கு முன்னர்,  இலங்கைக் குடியரசின் 9-வது நாடாளுமன்றத்தை அமைப்பதற்காக கடந்த ஆகஸ்ட் 5-ம் தேதி அன்று 2020 இலங்கையில் பொதுத்தேர்தல் நடந்தது. கொரோனா பெருந்தொற்று காரணமாக இத்தேர்தக்  இருமுறை வாக்களிப்பு நாள் தள்ளி வைக்கப்பட்ட பின் நடத்தப்பட்ட இத்தேர்தலில்  75% மக்கள் வாக்களிப்பில் கலந்து கொண்டனர்.

 225 நாடாளுமன்ற உறுப்பினர்களுக்கான இத்தேர்தலில் ஆளும் இலங்கை பொதுசன(சிறீலங்கா பொதுஜன பெரமுன) தலைமையிலான முன்னணி 145 இடங்களைக் கைப்பற்றி மிகப் பெரும்பான்மையைக் கைப்பற்றியது. எதிர்க்கட்சிகளான ஐக்கிய மக்கள் சக்தி 54 இடங்களையும், தேசிய மக்கள் சக்தி 3 இடங்களையும் கைப்பற்றின. ரணில் தலைமையிலான முக்கிய எதிர்க்கட்சியான ஐக்கிய தேசியக் கட்சி வரலாற்றில் மிகப்பெரும் தோல்வியைக் கண்டது. இது ஒரேயொரு இடத்தை மட்டுமே கைப்பற்றியது. ரணிலும் தோல்வியடைந்தார்.

பதவியேற்புக்கு பின் கூடிய முதல் நாடாளுமன்ற கூட்டத்தின் முதல்நாள் அமர்வில் தமிழ் மக்கள் தேசிய கூட்டணியின் தலைவரும், நாடாளுமன்ற உறுப்பினருமான சி.வி. விக்னேஷ்வரன் தனக்குத் தரப்பட்ட வாய்ப்பின்போது பேசினார்: அப்போது அவர் “இலங்கை நாடானது தமிழர் பூமி; இந்த மண்ணின் பூர்வீக குடிகள் தமிழர்கள்.தமிழ் மொழி இந்த நாட்டின் பிரதான மொழி. வடக்கு – கிழக்கில் வாழும் தமிழ் மக்களுக்கு சுயநிர்ணய உரிமை உண்டு. அதனை பாராளுமன்றம் அங்கீகரிக்க வேண்டும்” என்று தமிழ் மொழி, தமிழர்களின் பூர்வீகத் தன்மை, அவர்களது சுயநிர்ணய உரிமை குறித்து அழுத்தம் திருத்தமாக கருத்துக்களைத் தெரிவித்துள்ளார்.

ஆனால், நாடாளுமன்ற கூட்டத்தொடரின் இரண்டாவது நாளான இன்று, பிரதான எதிர்கட்சியான ஐக்கிய மக்கள் சக்தியின் நாடாளுமன்ற உறுப்பினர் மனுஷ நாணயக்கார ஒழுங்குப் பிரச்சினையை எழுப்பிப்பேசினார். அப்போது அவர்:  “ நாடாளுமன்றத்தில் சத்தியபிரமாணம் செய்துகொள்ளும் போது இந்த நாட்டில் தனி இராஜ்ஜியம் நிறுவுவதற்கோ, அவ்வாறான முயற்சிகளுக்கு ஒத்துழைப்பு மற்றும் நிதி பங்களிப்பு வழங்கும் நடவடிக்கைகளிலோ ஈடுபட மாட்டோம் என்ற அடிப்படையிலேயே நாடாளுமன்ற உறுப்பினர்கள் சத்தியப்பிரமாணம் செய்துக்கொள்வதாக அவர் குறிப்பிட்டார். இலங்கையில் யுத்தம் முடிவடைந்து அனைவரும் இலங்கையர்கள்  என்ற ரீதியில் ஒன்றிணைந்து பயணிக்க நினைக்கும் இந்த தருணத்தில், நாடாளுமன்ற உறுப்பினர் சி.வி.விக்னேஷ்வரன் வெளியிட்ட கருத்து மிக மோசமானது” என மனுஷ நாணயக்கார எதிர்ப்பு தெரிவித்துள்ளார்.

மேலும் பேசிய அவர்: “இலங்கை, தமிழர் பூமி; இந்த மண்ணின் பூர்வீக குடிகள் தமிழர்கள்: தமிழ் மொழி இந்த நாட்டின் பிரதான மொழி என  சி.வி.விக்னேஷ்வரனினால் கூறப்பட்ட கருத்து, நாடாளுமன்ற ஹன்சார்ட் பதிவுக்குச் சென்றுள்ளதாக கூறிய அவர், இலங்கை நாடாளுமன்ற ஹன்சார்ட்டில் விக்னேஷ்வரனின் கருத்து பதிவாகக் கூடாது” என, சபாநாயகர் மஹிந்த யாப்பா அபேவர்தனவிடம் அவர் கோரிக்கை வைத்தார். இதற்கு பதிலளித்த சபாநாயகர் “நாடாளுமன்ற உறுப்பினர் சி.வி.விக்னேஷ்வரன் வெளியிட்ட கருத்து தொடர்பில் ஆராயப்படும்” என கூறியுள்ளார்.